თავისუფალი და სამართლიანი არჩევნებისათვის უწყებათაშორისი კომისია საქმიანობის შუალედურ ანგარიშს აქვეყნებს. ანგარიშში აღნიშნულია, რომ არჩევნებისას გამოვლენილი კანონდარღვევების გამო, გამოძიება მიმდინარეობს სისხლის სამართლის 59 საქმეზე. 59 საქმიდან, 9 საქმეზე უკვე განხორციელდა კონკრეტული პირების მიმართ (სულ 11 პირი) სისხლისსამართლებრივი დევნა, მათ შორის − სსკ 125-ე მუხლით (ცემა) – 8 პირის მიმართ; 151-ე მუხლით (მუქარა) − 1 პირის მიმართ; და 162-ე პრიმა მუხლით (წინასაარჩევნო აგიტაციის დროს ცემა) − 2 პირის მიმართ. ამ საქმეებზე, სასამართლოს მიერ გამოყენებულია არასაპატიმრო აღკვეთის ღონისძიებები.მოცემულ 9 სისხლის სამართლის საქმეზე ინფორმაცია ასეთია: 1. „საქართველოს პატრიოტთა ალიანსის“ მაჟორიტარი დეპუტატობის კანდიდატის და წევრის ცემა დმანისის მუნიციპალიტეტის გამგეობის ინფრასტრუქტურის სპეციალისტის - საჯარო მოხელის მიერ; 2. „ერთიანი ნაციონალური მოძრაობიდან“ მარტვილის №65 საოლქო საარჩევნო კომისიის წევრის მიერ ამავე კომისიის წევრების („ქართული ოცნების“ წარმომადგენლების) ცემა; 3. „ერთიანი ნაციონალური მოძრაობის“ მხარდამჭერის მიერ უჩაშონის ადმინისტრაციულ ერთეულში ზუგდიდის მუნიციპალიტეტის გამგებლის წარმომადგენლის („ქართული ოცნების“ წევრის) ცემა; 4. სოფელ დიდინეძში „ერთიანი ნაციონალური მოძრაობის“ წარმომადგენლების მიერ „ქართული ოცნების“ ახალგაზრდული ფრთის წევრების და მხარდამჭერების, მათ შორის ერთი ახალგაზრდა გოგონას, წინასაარჩევნო აგიტაციის დროს ცემა; 5. სენაკის მუნიციპალიტეტის საკრებულოს სპეციალისტის მიერ დამოუკიდებელი (უპარტიო) მაჟორიტარი დეპუტატობის კანდიდატის ცემა; 6. „ერთიანი ნაციონალური მოძრაობის“ დედოფლისწყაროს რაიონული ორგანიზაციის ახალგაზრდული ფრთის წევრის მიერ „ქართული ოცნების“ რაიონული ორგანიზაციის წევრის ცემა; 7. „ერთიანი ნაციონალური მოძრაობის“ მხარდამჭერის მიერ პოლიტიკური გაერთიანების - „პაატა ბურჭულაძე - სახელმწიფო ხალხისათვის“ - წევრის, მარნეულის მაჟორიტარი დეპუტატობის კანდიდატის მიმართ მუქარის განხორციელება; 8. კასპის მუნიციპალიტეტის გამგეობის სპეციალისტისა და პოლიტიკური პარტია - „პაატა ბურჭულაძე - სახელმწიფო ხალხისათვის“ - აქტივისტის მიერ ერთმანეთის ცემის ფაქტი; 9. სოფელ გამარჯვებაში „ერთიანი ნაციონალური მოძრაობის“ წარმომადგენლის ცემის ფაქტი „ქართული ოცნების“ აქტივისტის მიერ.59 საქმიდან 1 საქმეზე სს კოდექსის მე-19-109-ე მუხლებით (განზრახ მკვლელობის მცდელობა) დაიწყო გამოძიება ინციდენტის საღამოსვე და გამოძიება ამჟამად მიმდინარეა (პარლამენტარ გ. თარგამაძის ავტომანქანის აფეთქების საქმე). წყარო:justice.gov.ge