თბილისის საქალაქო სასამართლოში მედიატორთა დაჯილდოვების ცერემონიალი გაიმართა. 23 მედიატორს პროფესიული სერტიფიკატები თბილისის საქალაქო სასამართლოს თავმჯდომარემ, ვასილ მშვენიერაძემ გადასცა.

მედიაციის ტრეინინგისათვის მონაწილეთა შერჩევა კონკურსის საფუძველზე განხორციელდა და მათ 56-საათიანი ინტენსიური კურსი გაიარეს. სასამართლოს მედიატორთა ტრეინინგის პროგრამა საერთაშორისო მეთოდოლოგიის გათვალისწინებით მომზადდა.

 თბილისის საქალაქო სასამართლოს მედიაციის ცენტრის მონაცემებით, სასამართლო მედიაციაზე მომართვიანობამ საგრძნობლად იმატა. მედიაცია მართლმსაჯულების სისტემის რეფორმის ნაწილია და იგი დავების ალტერნატიული მოგვარების მეთოდია. მისი განვითარება უზრუნველყოფს მართლმსაჯულების ხელმისაწვდომობას და მნიშვნელოვნად შეუწყობს ხელს სასამართლოს განტვირთვას.

 ტრეინინგები თბილისის საქალაქო სასამართლოსა და იუსტიციის უმაღლეს საბჭოს ეგიდით, ევროკავშირისა (EU) და გაეროს განვითარების პროგრამის (UNDP) მხარდაჭერით ჩატარდა. ასევე, მედიაცია საქართველოს ევროკავშირთან ასოცირების შესახებ შეთანხმების ერთ-ერთი მოთხოვნაა.

 ღონისძიებას ესწრებოდნენ საქართველოს იუსტიციის უმაღლესი საბჭოს მდივანი - გიორგი მიქაუტაძე, საბჭოს წევრები, გაეროს განვითარების პროგრამის (UNDP) ხელმძღვანელის მოადგილე საქართველოში, შომბი შარპი.