„საჯარო სამსახურის შესახებ” კანონში ცვლილება შევიდა. კერძოდ, ცვლილებების თანახმად, რეზერვისტებს სამსახურებრივი უფლებამოსილების შეჩერების პერიოდში თანამდებობრივი სარგოსა და საკლასო დანამატის მიღება შეეძლებათ. 
აღნიშნული ცვლილება, 2018 წლის 1-ლი ივნისიდან ამოქმედდება. 

ცნობისთვის, კანონის მოქმედი რედაქციით, თანამდებობრივი სარგო და საკლასო დანამატი არ უნარჩუნდება მოხელეს, რომელსაც სამსახურებრივი უფლებამოსილება შეუჩერდებოდა - პრეზიდენტის, წარმომადგენლობითი ორგანოს ან მუნიციპალიტეტის მერის არჩევნებში მოხელის კანდიდატად წარდგენისას, თუ კანონით სხვა რამ არ არის დადგენილი; მოხელის სამხედრო სავალდებულო სამსახურში ან არასამხედრო, ალტერნატიულ შრომით სამსახურში გაწვევისას, სამხედრო სარეზერვო სამსახურის გავლის, აგრეთვე სამხედრო სარეზერვო სამსახურისმოსამსახურეთა მობილიზაციის დროს, თუ მოხელეს აღარ შეუძლია სამსახურებრივი მოვალეობის შესრულება.

ცვლილებების შედეგად კი, 1-ლი ივნისიდან თანამდებობრივი სარგო და საკლასო დანამატი არ შეუნარჩუნდება იმ მოხელეს, რომელსაც სამსახურებრივი უფლებამოსილება შეუჩერდება - პრეზიდენტის, წარმომადგენლობითი ორგანოს ან მუნიციპალიტეტის მერის არჩევნებში მოხელის კანდიდატად წარდგენისას, თუ კანონით სხვა რამ არ არის დადგენილი; ასევე მოხელის სამხედრო სავალდებულო სამსახურში ან არასამხედრო, ალტერნატიულ შრომით სამსახურში გაწვევის შემთხვევებში. 

ამასთან, კანონის თანახმად, მოხელის სამსახურებრივი უფლებამოსილების შეჩერება სამსახურებრივი ფუნქციების შესრულებისაგან მის დროებით გათავისუფლებას ნიშნავს.