საქართველოს მთავრობის 2018 წლის 12 ივნისის N328 დადგენილების შესაბამისად, ცვლილება შევიდა ინტელექტუალური საკუთრების ობიექტების დაპატენტებასთან, რეგისტრაციასა და დეპონირებასთან დაკავშირებულ მომსახურების საფასურებში. 

დადგენილების მიღების საფუძველი საქართველოს საპატენტო კანონში 2017 წელს განხორციელებული ცვლილებები გახდა, რომელიც ითვალისწინებს დამატებითი დაცვის მოწმობის გაცემის შესაძლებლობის უზრუნველყოფას ისეთი გამოგონების პატენტზე, რომელიც გარდა ფარმაცევტული პროდუქტისა, ასევე ეხება მცენარეთა დაცვის საშუალებებს. 

„ცვლილებები ითვალისწინებს ქმედებების საფასურისთვის რედაქციული ხასიათის ცვლილებებს, მათ შორის გარკვეული საფასურების გაუქმებასა და პრაქტიკაში გამოვლენილი ხარვეზებიდან გამომდინარე, ზოგიერთი საფასურის დაზუსტებას. ამასთან, მოხდა საფასურების დიფერენცირება საქპატენტში მატერიალური სახით შეტანილ განაცხადსა და ელექტრონულ განაცხადს შორის, რაც მეტად წაახალისებს განმცხადებლებს გამოიყენონ ინტელექტუალური საკუთრების ობიექტებზე განაცხადის წარდგენის ელექტრონული გზა. 

ელექტრონულად შემოტანის შემთხვევაში შესაბამისი დამცავი დოკუმენტების (პატენტი, მოწმობა) გაცემის ჩათვლით საფასურებზე გავრცელდა 20%-იანი შეღავათი”, - განმარტავენ საქპატენტში.